Gjykata e Posaçme ka vendosur të pranojë kërkesën e ish-deputetit socialist Alqi Bllako për gjykim të shkurtuar. Kjo do të thotë se në rast se ai shpallet fajtor, i ulet 1/3 e dënimit.
Ka nisur procesi gjyqësor në themel lidhur me çështjen e inceneratorit të Tiranës. Ai akuzohet për “korrupsion pasiv” në dy raste, ndërkohë SPAK ka relatuar në mënyrë të përmbledhur provat dhe faktet që disponon në lidhje me çështjen në fjalë, duke dhënë edhe argumentat se përse kërkon dënimin e Bllakos.
Gjatë hetimeve, thotë Prokuroria e Posaçme, janë konstatuar veprime të kundraligjshme të kryera nga i pandehuri, ku dyshohet se në kohën kur ishte Sekretar i Përgjithshëm i Ministrisë së Mjedisit ai ka përfituar para në vlerën e rreth 120 mijë eurove e 7 milion e 520 mijë lekëve.
“Nga SPAK, janë paraqitur 37 fashikuj për çështjen e Bllakos”.
Seanca e radhës është caktuar në datë 29 Janar në orën 10:00, ditë kur do të caktohet pretenca për Alqi Bllakon. Në të njëjtën seancë do të jepen edhe argumentat e mbrojtjes.
Kujtojmë se më herët për këtë dosje, SPAK ka çuar në gjykatë 12 ish-zyrtarë, mes të cilëve edhe ish-ministrin Lefter Koka për akuzën e “Shpërdorimit të detyrës”.
Ndërkohë vijojnë hetimet për personat e tjerë që sipas SPAK janë të përfshirë në paligjshmëri në dosjen e inceneratorit të Tiranës.
