Në pamundësi për t’i marrë dëshminë një ditë më parë ish-ministrit të Shëndetësisë Ilir Beqaj, Komisioni Hetimor Parlamentar për Sterilizimin dhe Check-Up do të mblidhet sërish ditën e sotme.
Në kalendarin e punimeve të Kuvendit është përcaktuar ora 10:30 për mbledhjen e këtij komisioni, ku pritet të paraqitet përsëri ish-ministri Beqaj, i cili është thirrur si dëshmitar për rolin e tij si ministër Shëndetësie në kohën kur u firmosën dy kontratat koncesionare.
Të martën, mazhoranca dhe opozita u përfshinë në debate disa orëshe duke mos bërë të mundur dëshminë e Ilir Beqajt.
Debatet nisën pasi Beqaj kërkoi që të bënte fillimisht një prezantim të situatës së tij, duke përdorur “PowerPoint”.
Por opozita e refuzoi kategorikisht me argumentin se në ligj parashikohet një deklaratë e tij si dëshmitar dhe më pas seanca e pyetje-përgjigjeve, dhe jo prezantim me “PowerPoint”.
Nga ana tjetër, mazhoranca socialiste kërkoi nga kryetarja opozitare e komisionit, Albana Vokshi, që kërkesa e Beqajt të hidhej në votim. Por Vokshi nuk pranonte duke thënë se nuk mund të hedhë në votim një kërkesë të pabazuar në ligj.
Debatet mes palëve për këtë pikë zgjatën disa orë, duke bërë që mbledhja të përfundonte pa deklaratën apo dëshminë e Ilir Beqajt.
Ilir Beqaj u paraqit në komisionin parlamentar i prangosur dhe i shoqëruar me polici, për shkak se ka masë sigurimi arrest në burg për abuzim me fondet e BE kur drejtonte SASPAC. Ndërkohë që për sterilizimin në shëndetësi, që gjithashtu po hetohet nga Prokuroria e Posaçme, Beqaj ka masën detyrim paraqitje.
