Ministrja e Ekonomisë dhe Inovacionit, Delina Ibrahimaj, e pranishme në panelin e diskutimit për integrimin dhe konkurrueshmërinë e Europës, gjatë “Tirana Economic Forum”, theksoi se sfidat aktuale kërkojnë më shumë integrim dhe bashkëpunim ekonomik.
Ministrja Ibrahimaj bëri të ditur se mbi 70% e eksporteve shqiptare shkojnë drejt Bashkimit Evropian, ndërsa miliarda euro investime europiane kanë ndërtuar sektorë të rëndësishëm të ekonomisë kombëtare.
Sipas saj, mbi 10 milionë vizitorë nga BE vitin e kaluar tregojnë lidhjen e ngushtë të Shqipërisë me tregun e përbashkët evropian.
“Anëtarësimi i Shqipërisë në BE nuk është vetëm një çështje gjeografike, por një zgjedhje strategjike politike dhe ekonomike që forcon konkurrueshmërinë dhe qëndrueshmërinë e Evropës”, u shpreh ministrja.
Ibrahimaj nënvizoi se me afërsinë gjeografike, energjinë e pastër, rininë e kualifikuar dhe potencialin digjital, Shqipëria po bëhet një shtyllë e re për një Bashkim Evropian më të integruar dhe më të fortë.
Të dhënat e fundit të INSTAT-it që përfshijnë 7-mujorin e këtij viti tregojnë se shkëmbimet tregtare me vendet e BE-së zënë 56,7% të gjithë tregtisë.
Eksportet drejt vendeve të BE-së zunë 67,3% të eksporteve gjithsej dhe importet nga vendet e BE-së zunë 51,8% të importeve gjithsej. Partnerët kryesorë tregtarë janë Italia me 26,9% dhe Greqia me 7,6 %.
