Ministri për Evropën dhe Punët e Jashtme, Ferit Hoxha, priti sot në një takim ambasadorin e sapoemëruar të Turqisë në Shqipëri, Barış Erciyes.
Hoxha theksoi në një postim në rrjetet sociale se, në takim u rikonfirmua partneriteti strategjik dhe marrëdhëniet e shkëlqyera e të konsoliduara ndër vite ndërmjet Shqipërisë dhe Turqisë, të bazuara në respekt të ndërsjellë, besim dhe bashkëpunim të ngushtë, si dhe në lidhjet tona të përbashkëta historike e kulturore dhe interesat e përputhura si aleatë në NATO.
“Diskutimet tona u përqendruan në forcimin e mëtejshëm të bashkëpunimit dypalësh për të shfrytëzuar potencialet ende të pashfrytëzuara në sektorë kyç, përfshirë sigurinë dhe mbrojtjen, infrastrukturën, turizmin, arsimin dhe zhvillimin ekonomik”, u shpreh ministri Hoxha.
Gjithashtu, në takim u shqyrtuan mënyrat për zgjerimin e tregtisë dhe investimeve, duke u mbështetur në praninë e fortë dhe dinamike të bizneseve turke në Shqipëri.
“Theksuam rëndësinë e përpjekjeve të qëndrueshme dhe të koordinuara për të promovuar stabilitetin, sigurinë dhe bashkëpunimin në Ballkanin Perëndimor dhe më gjerë”, theksoi Hoxha.
Ministri Hoxha shprehu gatishmërinë për një bashkëpunim të ngushtë me ambasadorin Erciyes, në funksion të thellimit të mëtejshëm të marrëdhënieve dypalëshe dhe avancimit të prioriteteve të përbashkëta.
