Policia ka zbardhur ngjarjen tronditëse të ndodhur në Mallakastër, ku 50-vjeçarja Drita Saliaji është grabitur, lidhur me litar dhe hedhur në rezervuar, prej ku është gjetur e pajetë.
Policia ka arrestuar tre autorët e dyshuar të krimit, ku njëri prej tyre është nipi i viktimës (djali i vëllait të burrit), si dhe dy shokët e tij. Siç raporton policia, të rinjtë kanë shkuar për të vjedhur në banesën e 50-vjeçares dhe pas rezistencës së hasur nga kjo e fundit, e kanë hedhur në rezervuarin e fshatit Gjerbës.
Njoftimi i policisë:
Mallakastër
Policia zbardh në kohë rekord ngjarjen e ndodhur në datë 05.01.2020 në fshatin Gjerbës.
Arrestohen 3 shtetas të dyshuar si autorë të vrasjes së 50 vjeçares
Në orët e para të mëngjesit të sotëm, në Komisariatin e Policisë Mallakastër janë paraqitur familjarët e shtetases D. S, 50 vjeçe, të cilët denoncojnë largimin nga banesa të 50-vjeçares.
Pas marrjes së denoncimit, shërbimet e Komisariatit të Policisë Mallakastër në bashkëpunim me strukturat policore të Drejtorisë Vendore të Policisë Fier organizuan punën dhe në kohë rekord zbardhën ngjarjen.
Pas hetimeve të kryera rezultoi se nipi i shtetases së humbur (djali i vëllait të burrit), në bashkëpunim me 2 shokë të tij, në datën 05.01.2020 kanë shkuar për të vjedhur në banesën e 50-vjeçares dhe pas rezistencës të hasur nga kjo e fundit, e kanë hedhur në rezervuarin e fshatit Gjerbës.
Në vijim të punës për zbardhjen e plotë të ngjarjes, nga shërbimet e policisë Mallakastër dhe Polumbarët e Repartit Special Renea u gjet në rezervuar trupi i pajetë i shtetases D. S.
Specialistët për Hetimin e Krimeve të Rënda në Drejtorinë Vendore të Policisë Fier, arrestuan shtetasit:
L. S., 16 vjeç, banues në Gjerbës,.S. Sh., 16 vjeç, banues në Çërrillë, dhe E. Z., 26 vjeç, banues në Gjerbës, Mallakastër.
Materialet do i kalojnë Prokurorisë pranë Gjykatës së Shkallës së Parë Vlorë për veprime të mëtejshme.
