Ministrja e Drejtësisë, Albulena Haxhiu i është përgjigjur kritikave të shoqërisë civile që po e kundërshtojnë konceptin dhe projektligjin për konfiskimin e pasurisë së paligjshme.
Përmes një statusi në Facebook, Haxhiu ka ftuar shoqërinë civile për pjesëmarrje në grupet punuese në kuadër të Ministrisë së Drejtësisë, ndërsa ka shtuar se “paraja e pasuria e keqpërdorur duhet të konfiskohet”.
Ky është statusi i saj:
Ndër zotimet e para që kemi bërë para zgjedhjeve ka qenë angazhimi maksimal kundër krimit të organizuar e korrupsionit. Për këtë dhe për zotimet tjera kemi marrë mbështetje të madhe qytetare prandaj edhe do të punojmë shumë për t’i jetësuar zotimet tona.
Disa nga përfaqësuesit e shoqërisë civile që po e kundërshtojnë konceptin dhe projektligjin për konfiskimim e pasurisë së paligjshme, i ftoj për pjesëmarrje në grupet punuese në kuadër të Ministrisë së Drejtësisë.
Ne do të bashkëpunojmë me secilin që ka qëllime të mira.
Paraja e pasuria e keqpërdorur duhet të konfiskohet. Ajo është e qytetarëve dhe jo individëve të cilët kanë menduar që s’do të ndjeken kurrë për veprimet korruptive!
