Pjesa më e madhe e qytetit port grek të Volos është përfshirë nga përmbytjet për herë të dytë këtë muaj, pas shirave të dendur të një dite më parë.
“Porti i Egjeut u përfshi nga reshje shiu prej 113 milimetrash pasditen e djeshme, që vazhduan deri në mbrëmje”, tha shërbimi grek i motit meteo.gr.
Banorët mbetën të bllokuar në shtëpitë e tyre ndërsa rrugët u kthyen në lumenj duke bartur gurë, degë, mbeturina, kosha mbeturinash dhe madje edhe makina.
Shumë njerëz e kaluan natën pa energji elektrike dhe udhëtimi me makinë ishte i ndaluar.
”Jeta e njeriut është në rrezik, bota është në rrezik”, tha sot në mëngjes kryebashkiaku i Volosit, Achilleas Beos për ERTnews.
“Rreth 80% e qytetit është pa energji elektrike dhe shumë kanalizime kanë shpërthyer”, tha ai.
“Autoritetet e qytetit kanë punuar për të riparuar dëmet dhe për të pastruar mbeturinat dhe baltën e shkaktuar nga përmbytjet në fillim të muajit, por sistemet e kullimit nuk ishin në gjendje të përballonin sasinë e shiut”, tha ai.
Stuhia “Elias” shkaktoi përmbytje dhe rrëshqitje të tokës në gjysmën e pjesës veriore të ishullit Evia në jug të Volos, dhe toka bujqësore në veri të Volos u godit gjithashtu, me nivele uji që arrinin deri në një metër.
Shërbimet e urgjencës u thirrën nga pjesë të tjera të Greqisë dhe ushtria vendosi gomone në dispozicion për të shpëtuar njerëzit nga shtëpitë e tyre të përmbytura.
Rajoni i Volos dhe e gjithë Greqia qendrore u shkatërruan nga stuhia “Daniel” që shpërtheu midis 4 dhe 8 shtatorit.
Brenda më pak se 24 orëve u regjistruan reshje të paprecedentë prej më shumë se 700 milimetrash.
Pas vdekjes së 17 personave në Greqi, stuhia “Daniel” shkaktoi gjithashtu dëme katastrofike në Libi, dhe mijëra të vdekur pas shpërthimit të digave mbi qytetin port të Dernës.
