Franca po përballet me krizë financiare dhe politike, ndërsa borxhi publik është jashtë kontrollit dhe qeveria nuk gjen zgjidhje. Irlanda, Greqia, Portugalia dhe Italia kanë dhënë mësime më parë, por tani roli i “të sëmurit të madh të Evropës” i takon Francës.
Kriza u shfaq kur u bë votëbesimi në Asamblenë Kombëtare më 8 shtator. Kryeministri François Bayrou po përpiqet të miratojë masa për të ulur shpenzimet me 44 miliardë euro, por përballë ka kundërshtime të forta nga e djathta dhe e majta. Situata mund të çojë në zgjedhje të parakohshme ose edhe dorëheqjen e presidentit Emmanuel Macron.
Borxhi dhe protestat
Franca ka një borxh prej 3 300 miliardë eurosh, rreth 50 mijë euro për çdo qytetar, por askush nuk pranon sakrifica minimale. Për shembull, propozimi për heqjen e dy festave u refuzua menjëherë. Investitorët kanë frikë nga një kolaps i qeverisë, ndërsa indeksi në bursa ka rënë dhe normat e interesit për titujt shtetërorë janë ndër më të lartat në eurozonë, duke kaluar Greqinë dhe Portugalin.
Gjermania dhe efekti domino
Edhe Gjermania nuk po shkon mirë, duke qenë në recesion, dhe kështu motori ekonomik franco-gjerman është në ngërç. Investitorët tani favorizojnë Gjermaninë, duke e detyruar Francën të paguajë interesa më të larta për të huazuar.
Shqetësime sociale dhe politike
Franca mbetet një vend i polarizuar, e djathta kritikon përkujdesjen e tepërt nga shteti, emigracionin dhe BE-në, ndërsa e majta kërkon rritje taksash për të pasurit.
Nën presidencën e Macron, borxhi është rritur mbi 1 mijë miliardë euro dhe reformat nuk kanë qenë të efektshme, ndërkohë që shpenzimet publike vazhdojnë të rriten në pensione, shëndetësi dhe asistencë sociale.
