Ndërmarrja amerikane e orendive shtëpiake dhe dekoreve “Pier 1 Imports”, e cila ka rreth 1.000 dyqane në SHBA dhe Kanada ka paraqitur falimentimin pas problemeve financiare ndër vite, (AA).
Kompania, e cila tashmë ishte në procesin e mbylljes së 450 dyqaneve, po ashtu bëri të ditur se ka miratimin e huadhënësve të saj për shitjen e kompanisë.
Shefi ekzekutiv i kompanisë dhe i financave, Robert Riesbeck, tha se vendimi për të paraqitur mbrojtje falimentimi do t’i japë kompanisë më shumë “kohë dhe fleksibilitet financiar” për të çuar kompaninë “Pier 1 Imports” deri në shitje.
Kompania tha se do të fillojë procedurat e falimentimit edhe në Kanada.
Shitësi me pakicë me qendër në SHBA ka vuajtur gjithnjë e më shumë nga efektet negative të rritjes së tregtisë elektronike. Më herët, zinxhiri i supermarketeve “Walmart”, po ashtu njoftoi se do të ul kostot e kompanisë duke mbyllur qindra dyqane.
