Kryetari i Bashkisë së Tiranës Erion Veliaj ka depozituar një kërkesë në Gjykatën Kushtetuese kundër vendimit të Gjykatës së Posaçme (GJKKO) për kalimin e dosjes së tij në gjykim.
Mbrojtja e tij pretendon se procesi gjyqësor është zhvilluar në shkelje të rëndë të të drejtave themelore. Sipas avokatëve, Veliaj nuk ka pasur kohë të mjaftueshme për të analizuar dosjen voluminoze me materiale të shumta.
Në kërkesën drejtuar Kushtetueses, mbrojtja kërkon shfuqizimin e vendimit të seancës paraprake. Po ashtu kërkohet shpallja e pavlefshme e të gjitha veprimeve të kryera mbi bazën e atij vendimi. Avokatët kërkojnë edhe antikushtetutshmërinë e disa dispozitave ligjore që lidhen me procesin penal.
Sipas tyre, mënyra e zhvillimit të gjykimit cenon prezumimin e pafajësisë dhe dinjitetin e të pandehurit. Ata theksojnë se mbajtja në kushte izolimi gjatë seancave ka ndikuar në të drejtën e mbrojtjes. Mbrojtja e Veliajt e konsideron këtë çështje si një test për funksionimin e shtetit të së drejtës në Shqipëri.
Kërkesa e plotë e avokatëve të kryetarit të Bashkisë së Tiranës, Erion Veliaj
Të nderuar përfaqësues të medias,
Në vijim të praktikës sonë për të informuar opinionin publik mbi çdo veprim ligjor të ndërmarrë nga mbrojtja e z. Veliaj, ju bëjmë me dije se sot kemi depozituar në Gjykatën Kushtetuese kërkesën për shfuqizimin e vendimit nr. 29, datë 09.02.2026, të Gjykatës së Posaçme të Shkallës së Parë për Korrupsionin dhe Krimin e Organizuar, si dhe për pavlefshmërinë e të gjitha veprimeve të kryera mbi bazën e këtij vendimi.
Kërkesa jonë përfshin gjithashtu shpalljen si antikushtetuese të dy dispozitave ligjore që kanë kontribuar drejtpërdrejt në cenimin e të drejtave kushtetuese të z. Veliaj, si dhe të çdo qytetari të Republikës së Shqipërisë, që ndodhet në të njëjtat kushte.
Thelbi është i qartë:
Ky proces është zhvilluar në shkelje të rëndë të të drejtave themelore. Z. Veliaj dhe mbrojtjes së tij i është mohuar koha reale për të analizuar një dosje me dhjetëra mijëra faqe, duke e reduktuar mbrojtjen në një formalitet; Parimi i barazisë është cenuar, pasi prokuroria ka vepruar në avantazh të plotë procedural; Gjykimi është zhvilluar në kushte që cenojnë pavarësinë dhe paanshmërinë e gjykatës; Z. Veliaj është trajtuar në mënyrë të tillë që cenon prezumimin e pafajësisë dhe dinjitetin njerëzor, përfshirë mbajtjen në kushte izolimi gjatë seancave ku ai duhet të mbrohet i lirë.
Në këto kushte, vendimi për dërgimin e çështjes në gjyq është marrë mbi një proces të kompromentuar në themel, duke prodhuar një proces antikushtetues dhe për rrjedhojë, të pavlefshëm, i cili nuk mund të prodhojë pasoja juridike të vlefshme.
Për këto arsye, i kemi kërkuar Gjykatës Kushtetuese:
të shfuqizojë vendimin e seancës paraprake;
të shpallë të pavlefshme veprimet e kryera mbi bazën e tij;
të shpallë si të papajtueshëm me Kushtetutën nenin 14 të ligjit nr. 95/2016;
të shpallë si të papajtueshëm me Kushtetutën nenin 332/gj të Kodit të Procedurës Penale.
Kjo nuk është thjesht një çështje individuale. Është një sfidë për rivendosjen e rendit kushtetues dhe lidhet drejtpërdrejt me mënyrën se si funksionon drejtësia në këtë vend. Ne do të përdorim çdo mjet ligjor për të garantuar që Kushtetuta dhe standardet evropiane të mos mbeten deklarative në letër, por të zbatohen realisht, ashtu siç sovrani – populli shqiptar – ka shprehur vullnetin e tij përmes miratimit të Kushtetutës.
Faleminderit.
Av. Plarent Ndreca
Mbrojtësi i z. Erion Veliaj
