Vendimet e fundit tarifore të presidentit amerikan kanë shkaktuar lëkundje në tregjet financiare ndërkombëtare, duke dobësuar ndjeshëm pozitat e dollarit amerikan dhe duke ngjallur shqetësime për një recesion të mundshëm në SHBA.
Lëvizjet më të fundit të presidentit amerikan Donald Trump në drejtim të tarifave doganore kanë krijuar një valë shqetësimesh në tregjet financiare anembanë globit. Ndërsa bursat botërore kanë arritur të rikuperojnë pjesërisht humbjet, dollari amerikan ka dalë si një nga humbësit më të mëdhenj nga kjo krizë e re tregtare.
Sipas analistëve të tregjeve valutore, pas njoftimit për tarifat e reja, investitorët kanë braktisur dollarin dhe janë orientuar drejt valutave më të qëndrueshme si euro, frangu zviceran dhe jeni japonez.
Kjo ka sjellë një rritje të ndjeshme të vlerës së euros, e cila në disa tregje ka kapërcyer kufirin e 1.14 dollarëve – niveli më i lartë në tre vitet e fundit.
Indeksi i dollarit, që mat forcën e tij përballë gjashtë monedhave kryesore botërore, ka shënuar një rënie të ndjeshme, duke zbritur në nivele që nuk janë parë që prej vitit 2022. Deri më tani, nuk është raportuar ndonjë ndërhyrje konkrete për të frenuar këtë rënie.
Ndërkohë, ekspertët ekonomikë paralajmërojnë se politikat doganore të Trumpit, të cilat shihen si të paparashikueshme, po e shtojnë rrezikun që ekonomia amerikane të përballet me një recesion.
Sipas raportimeve të mediave ndërkombëtare, shqetësimi i tregjeve tashmë nuk lidhet vetëm me inflacionin, por me pasojat e mundshme afatgjata për rritjen ekonomike.
Edhe pse dollari është në rënie të lirë, presidenti Trump nuk shfaq shqetësim. Përkundrazi, ai e konsideron këtë dobësim si një avantazh ekonomik, pasi sipas tij, një monedhë më e dobët ndihmon në uljen e borxhit kombëtar dhe përmirëson bilancin tregtar të SHBA-së.
