Një delegacion rus do të vizitojë Turqinë të mërkurën për të diskutuar mbi situatën e fundit në Idlib, në veriperëndim të Sirisë, tha të martën presidenti turk, Recep Tayyip Erdoğan (AA).
“Ne përpiqemi të përcaktojmë hartën tonë rrugore duke negociuar me Rusinë në nivelin më të lartë”, u tha Erdoğan gazetarëve përpara nisjes së tij për në Azerbajxhan.
Turqia po punon ngushtë me Rusinë për të zgjidhur çështjet në Idlib dhe Libi, shtoi ai. Presidenti turk tha se ai mund të takohet me homologun e tij rus Vladimir Putin më 5 mars për të diskutuar zhvillimet e fundit në rajon.
Rajoni i Idlibit, i cili ndodhet afër kufirit jugor të Turqisë, është përfshirë në një zonë të de-eskalimit të parashikuar sipas një marrëveshje midis Turqisë dhe Rusisë në fund të vitit 2018.
Regjimi sirian dhe aleatët e tij, megjithatë, kanë thyer vazhdimisht armëpushimin, duke ndërmarrë sulme të shpeshta brenda territorit ku aktet e agresionit janë të ndaluara shprehimisht.
Zona e de-eskalimit aktualisht është vend strehimi i rreth 4 milionë civilëve, përfshirë qindra mijëra të zhvendosur në vitet e fundit nga forcat e regjimit në të gjithë vendin e shkatërruar nga lufta.
Turqia ka bërë thirrje për ndërprerjen e menjëhershme të sulmeve mbi Idlib, duke kërkuar respektimin e armëpushimit, dhe e ka ftuar bashkësinë ndërkombëtare të ndërmarrë veprime.
