Bursat evropiane u hapën me rënie të ndjeshme sot, pasi një fjalim më agresiv se sa pritej nga Donald Trump përpara kombit, ka zbehur shpresat e investitorëve për një fund të shpejtë të luftës në Lindjen e Mesme.
Rreth 40 minuta para hapjes së tregjeve, kontratat futures për indeksin parisien CAC 40 shënonin një rënie prej 1,58%.
Ndërkohë, tregjet në Frankfurt dhe Londër ranë me 1,99% dhe 0,80%, ndërsa Milano pritej të humbte 1,68%.
Kjo kthesë vjen vetëm një ditë pasi bursat kishin përfunduar me rritje të fortë, të nxitura nga optimizmi se konflikti mund të përfundonte brenda dy ose tre javësh, sipas deklaratave të mëparshme të Trump.
Megjithatë, ky optimizëm u shua pas fjalimit të tij në Uashington, ku presidenti amerikan theksoi se Shtetet e Bashkuara të Amerikës janë “pranë përmbushjes” së objektivave në ofensivën kundër Iranit, por paralajmëroi se sulmet do të vazhdojnë “shumë ashpër”.
Sipas analistit John Plassard nga Cité Gestion Private Bank, këto deklarata “kanë ftohur qartësisht shpresat për një shpërshkallëzim të shpejtë”.
Ndërkohë, çmimet e naftës janë rikthyer në rritje.
Nafta Brent e Detit të Veriut u rrit me 5,89%, duke arritur në 107,12 dollarë për fuçi, ndërsa WTI amerikan u rrit me 5%, në 105,13 dollarë.
Trump gjithashtu kërcënoi se mund të godasë infrastrukturën energjetike të Iranit, duke paralajmëruar se në mungesë të një marrëveshjeje, SHBA do të “godasë shumë fort çdo central elektrik”.
Nga ana tjetër, ushtria iraniane premtoi sulme “shkatërruese” ndaj SHBA-së dhe Izraelit, ndërsa Izraeli raportoi për sulme të reja me raketa dhe dronë nga Irani gjatë natës dhe mëngjesit të së enjtes, duke shtuar tensionet në rajon.
