Një grup prej 7 personash u arrestuan të Hënën në një operacion të gjerë të zhvilluar nga Policia dhe Prokuroria, si të dyshuar për “planifikimin dhe kryerjen e vrasjes” së policit Muhamed Lika.
Krimi besohet se u krye për motive që lidhen me punën e tij zyrtare.
I dyshuari kryesor doli dje para gjykatës dhe ndaj tij u caktua masa e paraburgimit, ndërsa për 6 të tjerët u kërkua e njëjta masë sigurie.
Dosja e Prokurorisë ka zbuluar detaje nga ekzekutimi i Muhamed Likës, natën e 1 Prillit, te ndërtesa ku jetonte në Kaçanik.
Rreth orës 23:00, në katin e dytë të banesës, i mituri në bashkëpunim me të tjerët dyshohet se kanë vrarë policin, akt kriminal i planifikuar.
Sipas Prokurorisë, ata e kishin ndjekur policin derisa është futur në ndërtesë, e më pas autori (i mitur) ka shkuar dhe e ka qëlluar me armë zjarri.
Bazuar në ekzaminimet e kryera në vendin e ngjarjes, polici është gjuajtur me 4 plumba dhe si pasojë e plagëve të rënda që ka pësuar, nuk ka arritur të mbijetojë.
Në kërkesën e Prokurorisë është bërë e ditur se i mituri është larguar nga vendngjarja dhe është bashkuar me të dyshuarit e tjerë, ku njëri prej tyre është dëgjuar duke i thënë “bravo, ik”.
Në konferencën e mbajtur dje nga Policia dhe Prokuroria, u bë e ditur se disa prej të dyshuarve kanë të kaluar kriminale.
