Kreu i Partisë Demokratike, Sali Berisha, ka përjashtuar kategorikisht mundësinë e largimit të tij nga politika, duke deklaruar se një vendim i tillë do të shërbente vetëm për forcimin e kryeministrit Edi Rama.
I pyetur nëse do të ishte i gatshëm të hidhte hapin e parë dhe të largohej nga drejtimi i opozitës, Berisha u përgjigj prerë se kjo nuk do të ndodhë kurrë, duke e cilësuar kërkesën si absurde.
Sipas tij, largimi nga politika do të nënkuptonte forcimin e Ramës, ndërsa akuzoi ata që kërkojnë tërheqjen e tij se janë mbështetës të kryeministrit.
Berisha kundërshtoi gjithashtu krahasimet mes tij dhe Ramës, duke deklaruar se sot në Shqipëri ekziston një opozitë e vërtetë.
“Kjo nuk ndodh kurrë, është absurde. Kjo do të thotë të forcosh Edi Ramën dhe të lash dorën e tij të zezë. Lëpirësit dhe puthadorët e Ramës thonë ashtu. Të na krahasosh ne të dy është të krahasosh ditën me natën. Tani ka një opozitë të vërtetë.”, tha ai.
