Kryetari i Partisë Demokratike, Sali Berisha e konsideroi sot burgosjen e deputetit Ervin Salianji një akt lufte, ndërsa u shpreh se “PD do t’i përgjigjet këtij akti lufte me qëndresën dhe me mosbindjen më të fuqishme civile”.
Në një konferencë për shtyp, Berisha tha se PD nuk kalon në klandestinitet dhe as nuk shmang proceset zgjedhore.
“Por kjo parti do të përdorë të gjithë guximin, vendosmërinë, trimërinë, e mijëra e mijëra anëtarëve dhe mbështetësve të saj, në mënyrë që t’i japë përgjigjen më të merituar mafias Rama-Xhafaj, në mënyrë që të realizojë atë që në pamje të parë duket mision i pamundur. Por si parti e misioneve të mëdha e të pamundshme, për demokratët sot nuk ka asgjë të pamundshme”, u shpreh Berisha.
Ai u shpreh se synimi është që të çelë për shqiptarët rrugën e zgjedhjeve të lira në një qeveri teknike.
Berisha theksoi po ashtu se “6 tetori do të jetë një protestë kombëtare”.
“Së pari do të jetë padiskutim protestë kombëtare. Kjo jashtë çdo dyshimi. Deputetët e opozitës do të jenë në udhëheqje të protestës, revoltës dhe mosbindjes civile në çdo vend, përfshirë dhe sallën e parlamentit, aty ku të lipset dhe t’i kërkojë nevoja, ku të japin më shumë në këtë betejë. Për deputetë, drejtuesit e PD, ka vetëm një objektiv dhe moto, betejë, betejë dhe vetëm betejë”
