Mes Bashkimit Evropian (BE) dhe Britanisë arrihet marrëveshje në negociatat për përcaktimin e kuotave të peshkimit për vitin 2021, transmeton Anadolu Agency (AA).
Në një njoftim nga Komisioni i BE-së thuhet se me marrëveshjen e arritur mes BE-së dhe Britanisë janë përcaktuar kuotat e peshkimit të vitit 2021 për 75 lloje dhe lejet që do të jepen për disa rezerva të detit të thellë.
Ndërkohë, bëhet e ditur se ende nuk janë ndarë detajet teknike të marrëveshjes në fjalë.
Peshkimi dhe kuotat në fjalë ishin temat më të vështira në negociatat mbi Brexit-in mes BE-së dhe Britanisë. Në marrëveshjen e tregtisë dhe bashkëpunimit mes palëve parashikohej që kuota e BE-së në ujërat britanike të ulej 25 për qind deri në vitin 2026 dhe që të përcaktoheshin kuota të ndara vjetore për çdo lloj peshku.
Administrata e ishullit britanik Jersey në muajin maj u kërkoi anijeve franceze të peshkimit që dëshironin të vazhdonin peshkimin në ujërat e tyre, të paraqesin provë lidhur me aktivitetet e tyre të peshkimit në të kaluarën. Kjo situatë shkaktoi tensione mes Britanisë dhe Francës.
Pas kësaj Franca kërcënoi ishullin Jersey me ndërprerje të energjisë, ndërsa edhe peshkatarët francezë me bllokadën e portit të ishullit.
Qeveria britanike si masë paraprake dërgoi dy anije të flotës në ishullin Jersey, ndërsa pas kësaj situate edhe qeveria franceze si kundërpërgjigje vendosi të dërgojë dy anije të flotës së saj në rajon.
Pas përfundimit të bllokadës së peshkatarëve francezë anijet e flotave u tërhoqën në mënyrë të ndërsjellë.
