Zëvendëskryeministrja, njëherësh ministre i Infrastrukturës dhe Energjisë, Belinda Balluku, inspektoi të premten punimet për ndërtimin e hekurudhës Tiranë-Rinas-Durrës.
Balluku gjatë inspektimit tha se, tashmë punimet për këtë linjë kanë hyrë në një fazë të re. Numri dy i qeverisë nënvizoi se për ti dhënë një hov të ri ecurisë së punimeve ka hyrë dhe makineria moderne “Tamping”.
“Makineri që nuk e kemi patur parë më parë në Shqipëri. Makineria drejton shinat, krijon stabilitet për sa i përket zhavorrit, çakullit dhe proceseve që duhen për të krijuar këtë linjë të re të hekurudhës”, tha Balluku.
Zv/kryeministrja tha se 80% e proceseve për trasenë e hekurudhës janë bërë.
“Nuk është thjeshtë traseja, ku kemi ecur me një shpejtësi të mirë, ku rreth 80% e proceseve janë bërë. Jemi duke avancuar me komponentët e tjerë, siç është dhe pjesa e stacioneve. Pra është mbyllur gara ndërkombëtare dhe jemi në momentin që po lidhet kontrata për ndërtimin e 10 stacioneve”, tha Balluku, teksa u shtua se në nëntor nis dhe ndërtimi i tyre.
Punimet për vendosjen në punë të trenit elektrik që lidh Tiranën me Durrësin e më pas me Aeroportin Ndërkombëtar të Rinasit po avancojnë.
Hekurudha Tiranë-Durrës, një projekt i rëndësishëm kombëtar që jo vetëm që do të përmirësojë lidhjen mes kryeqytetit, qytetit bregdetar dhe aeroportit, por gjithashtu do të kontribuojë në reduktimin e ndotjes dhe në zhvillimin e transportit të qëndrueshëm, pritet të përmbyllet në muajin mars të vitit të ardhshëm.
Sipas projektit të kësaj linje hekurudhore, koha e udhëtimit Tiranë-Durrës do të jetë 22 minuta dhe Tiranë-Rinas vetëm 12 minuta.
Linja do të ketë 11 stacione, të cilat do të nisin nga Durrësi, për të vijuar në Shkozet-Sukth-Vorë-Kashar, linja këto ekzistuese me nevoja për rikonstruksion.
Më pas aksi hekurudhor do të vijojë në Laknas, Aeroporti i Tiranës dhe Terminali i Transportit Publik Tiranë.
Stacioni i 9-të dhe i 10-të janë parashikuar dhe projektuar të ndërtohen në kontratën e segmentit shtesë nga Terminali i Transportit Publik Tiranë deri te Bulevardi i Ri. Ndërkohë stacioni i 11-të është menduar të shtrihet në kryqëzimin e rrugës “Jordan Misja” – Bulevardi i Ri.
Treni i hekurudhës Tiranë-Durrës do të jetë elektrik, ndërkohë që shpejtësia e lëvizjes parashikohet në 100 km/orë. Hekurudha është e gjatë 39 km dhe financimi i saj mbështetet nga BERZH përmes një kredie me vlerë 70 milionë euro.
