Policia e Tiranës bëri të ditur sot se, në kuadër të operacionit të koduar “Bilanci”, shërbimet e Sektorit për Hetimin e Krimeve Ekonomiko-Financiare arrestuan administratorin e një spitali privat, shtetasin E. Z., 62 vjeç, si dhe shpallën në kërkim dy bashkaksionerë të subjektit, shtetasin turk B. K., 45 vjeç dhe shtetasen shqiptare G. A., 32 vjeçe.
Sipas njoftimit zyrtar, gjatë një periudhe hetimore disamujore, në bashkëpunim me Prokurorinë e Tiranës, u konstatua se subjekti kishte kryer evazion fiskal në vlerën mbi 1 milion euro, përmes lëshimit të faturave të pafiskalizuara.
Policia sqaron se, nga hetimet dhe kontrollet rezultoi se “subjekti nuk kishte deklaruar fitime me vlerë mbi 1 000 000 euro, gjatë periudhës 2024-2025. Shërbimet spitalore në këtë subjekt kryheshin me produkte të ndaluara për përdorim. Në këtë subjekt punonin shtetas të pasiguruar”.
Policia po ashtu ka bllokuar subjektin dhe sekuestrohen 100 blloqe me mandate të pafiskalizuara, 27 lloje medikamentesh të dyshuara të skaduara dhe 6 njësi kompjuterike.
Gjatë operacionit “Bilanci”, shërbimet e Sektorit për Hetimin e Krimeve Ekonomiko-Financiare arrestuan administratorin e spitalit, shtetasin E. Z., 62 vjeç, si dhe shpallën në kërkim bashkaksionerët e subjektit, shtetasin turk B. K., 45 vjeç dhe shtetasen shqiptare G. A., 32 vjeçe.
Gjatë periudhës hetimore disamujore, në koordinim me Prokurorinë e Tiranës, si dhe nga kontrollet në subjekt, u konstatua se nëpërmjet lëshimit të faturave të pafiskalizuara, ishte kryer evazion fiskal me vlerë mbi 1 milion euro. Gjithashtu, në spital përdoreshin medikamente të dyshuara të kontrabanduara, të ndaluara për përdorim, nga autoritetet kompetente, si dhe ishin punësuar pa u siguruar, pesë shtetas.
Policia bën të ditur se po punohet për kapjen e dy shtetasve të shpallur në kërkim, si dhe për provimin e plotë të këtyre veprimtarive kriminale.
Materialet procedurale iu referuan Prokurorisë së Tiranës, për veprime të mëtejshme.
