Kryetari i grupit parlamentar në Partinë Demokratike, Gazment Bardhi u shpreh sot në një reagim pas arrestimit të ish-deputetit të Partisë Socialiste Jurgis Çyrbja, i akuzuar nga nga Prokuroria e Posaçme Kundër Krimit të Organizuar (SPAK) për tre vepra penale, se Partia Socialiste dhe Kryeministri janë të gjunjëzuar para krimit të organizuar.
Nëpërmjet një postimi në rrjetet sociale, Bardhi tha se “firma e Edi Ramës si kryetar i PS për të plotësuar kërkesën e një prej grupeve më të rrezikshme të krimit të organizuar është akti më domethënës i gjunjëzimit të një partie politike dhe të Kryeministrit përpara tyre. Ky nuk është një rast i izoluar, por i shtrirë në çdo qark, në çdo bashki”.
Bardhi tha se trajtimi i krimit të organizuar si bashkëaksioner në qeverisje është rënie e shtetit, asgjësim i zgjedhjeve të lira, vdekje e demokracisë.
Sipas Bardhit, kjo e bën zyrtarisht Shqipërinë vendin e parë në botë që qeveriset me prova të pakontestueshme nga krimi i organizuar.
