Komisioni për Bujqësinë, Ushqimin dhe Zhvillimin Rural shqyrtoi sot projektligjin “Për disa ndryshime dhe shtesa në ligjin ‘Për burimet ujore’, të ndryshuar”, i cili parashikon kalimin e Agjencisë së Menaxhimit të Burimeve Ujore në varësi të Ministrisë së Mjedisit.
Projektligji u prezantua sot në mbledhjen e komisionit nga zëvendësministri i Mjedisit, Gent Gazheli, i cili theksoi se ndryshimet synojnë forcimin e menaxhimit të integruar të burimeve ujore dhe harmonizimin e mëtejshëm me legjislacionin e Bashkimit Europian.
Sipas Gazhelit, kalimi i agjencisë në varësi të Ministrisë së Mjedisit është në përputhje me qasjen e Komisionit Europian, që e konsideron menaxhimin e ujit si një çështje të lidhur ngushtë me politikat mjedisore dhe zhvillimin e qëndrueshëm.
“Ky ndryshim do të ndihmojë në koordinimin më të mirë të politikave për menaxhimin e ujit dhe në rritjen e eficiensës institucionale në këtë sektor”, deklaroi Gazheli.
Ai bëri të ditur se projektligji vjen në zbatim të sugjerimeve të raportit të SIGMA-s 2025, si dhe rekomandimeve për reformimin e administratës shtetërore, që parashikon rishikimin e varësisë institucionale të agjencive.
Janë 26 agjenci në varësi të Kryeministrisë, të cilat parashikohet të kalojnë gradualisht në varësi të ministrive përkatëse, me synim përmirësimin e menaxhimit dhe rritjen e përgjegjshmërisë administrative.
Në relacionin shoqërues të projektligjit theksohet se ndryshimet do të kontribuojnë në forcimin e menaxhimit të integruar të burimeve ujore, përmirësimin e koordinimit ndërinstitucional dhe përafrimin me standardet europiane në fushën e mjedisit dhe ujërave.
Anëtarët e komisionit diskutuan mbi rëndësinë e reformës institucionale dhe ndikimin që pritet të ketë ajo në administrimin më efikas të burimeve ujore në vend.
