Një 31 vjeçar në Elbasan është arrestuar pasi akuzohet për veprën penale e pastrimit të parave.
Në pranga ka rënë shtetasi Marsel Arani 31 vjeç, banues në Elbasan.
Uniformat blu i kanë sekuestruar të riut një apartament në Durrës dhe 3 automjete, pasuri këto me vlerë 136 mijë euro.
Dyshohet se paratë e kanë burimin nga aktivitete kriminale.
Sakaq, kjo nuk është hera e parë që Aranit i vihen pranga, pasi ka qenë i arrestuar më parë në Itali, për shfrytëzim prostitucioni.
NJOFTIMI
DVP Elbasan
Finalizohet operacioni policor i koduar “Resource”.
Në kuadër të një procedimi për gjurmimin, lokalizimin dhe sekuestrimin e pasurive që rrjedhin nga veprimtaritë kriminale, specialistët e Seksionit për Hetimin e Krimeve Ekonomike dhe Financiare, në bashkëpunim me Prokurorinë e Elbasanit, kanë organizuar dhe finalizuar operacionin policor të koduar “Resource”.
Si rezultat i operacionit, në bashkëpunim me shërbimet e Forcës së Posaçme Operacionale, u kap dhe u ndalua shtetasi M. A., 31 vjeç, banues në Elbasan, të cilit Gjykata e Shkallës së Parë e Juridiksionit të Përgjithshëm Elbasan, me vendimin e datës 01.12.2024, i ka caktuar masën e sigurisë “Arrest në burg”, për veprën penale “Pastrimi i produkteve të veprës penale ose veprimtarisë kriminale”.
Gjithashtu, u bë sekuestrimi i pasurive me vlerë rreth 136 000 euro (1 apartament në Durrës dhe 3 automjete), të cilat dyshohet se e kanë burimin nga veprimtaritë kriminale të këtij shtetasi.
31-vjeçari ka qenë i arrestuar më parë në Itali, për pjesëmarrje në organizatë kriminale për shfrytëzim prostitucioni.
Materialet procedurale i kaluan Prokurorisë, për veprime të mëtejshme.
