Nënkryetarja e Partisë së Lirisë, Erisa Xhixho ka reaguar nëpërmjet një postimi në rrjetet sociale në lidhje me buxhetin e vitit 2025.
“A e dini ku do të shkojnë paratë e qytetarëve me buxhetin e vitit 2025? Një buxhet prej 8.2 miliardë euro, nuk do të shkojnë për të përmirësuar jetën e qytetarëve,” thotë Xhixho.
Sipas Xhixhos pjesa më e madhe e parave publike shkon për projekte infrastrukturore, tendera ku kostot fryhen në mënyrë fiktive, dhe paratë shkojnë aty ku kanë shkuar gjithnjë: në xhepat e klientëve të qeverisë.
Duke kritikuar buxhetin e vitit 2025, Xhixho deklaron se me buxhetin e vitit 2025, qeveria i jep “pjesën e luanit” klientëve të saj dhe “thërrimet” qytetarëve.
“Qeveria ka parashikuar të shtojë: 0.88 miliardë lekë për kontrollin e checkup-it, një aferë korruptive; 1.9 miliardë lekë për koncesionin e sterilizimit, përsëri aferë korruptive; 1.9 miliardë lekë për shërbimet spitalore, ndërkohë që mbetet fakt se qytetarët shqiptarë, 60% të shpenzimeve i paguajnë nga xhepi; dhe 1.3 miliardë lekë për inceneratorin fantazmë të Tiranës, megaaferën e shekullit atë të inceneratorëve”, shkruan Xhixho.
