Në komisionin e Ligjeve u zhvillua sot seanca dëgjimore me Inspektoratin e Lartë të Deklarimit dhe Kontrollit të Pasurive dhe Konfliktit të Interesave (ILDKPI), në lidhje shqyrtimin e projektligjit “Për buxhetin e vitit 2025”.
Mirela Gega, përfaqësuese e IDKPI-së, tha në komision së për këtë institucion për vitin 2025 është akorduar një fond prej 297 milionë lekë të reja, e ndarë për shpenzime korente 244 milionë lekë dhe fondi për investimet 53.6 milionë lekë.
Sipas Gegës, me këtë projekt-buxhet janë reflektuar të gjitha kërkesat dhe propozimet që ILDKPI ka pasur për vitin 2025.
“Ka pasur një bashkëpunim me Ministrinë e Financave dhe kërkesat tona janë reflektuar, duke filluar e nga efektet e ndryshmeve të VKM-së për pagat e nëpunësve civilë ashtu edhe punonjësve mbështetës, ashtu edhe për projektet që kemi propozuar në zërin investimeve.
Kërkesat buxhetore gjithmonë ka për fonde shtesë, por për momentin buxheti që është parashikuar nuk na kufizon në arritjen e përmbushjes së objektivave që ka institucioni jonë”- tha Gega.
Sipas relatorit Klevis Xhoxhi, të gjitha kërkesat e ILDKPI-së janë të akorduar nga qeveria për vitin 2025.
