Ukraina po lëviz me shpejtësi të jashtëzakonshme drejt anëtarësimit në Bashkimin Evropian, deklaroi presidentja e Komisionit Evropian Ursula von der Leyen në një video.
Në një video të shkurtër, të postuar në X, për të shënuar ditën e pavarësisë së Ukrainës, von der Leyen tha se “Evropa do të jetë gjithmonë në anën e Ukrainës sepse Ukraina është Europa. Liria juaj është liria jonë. Siguria juaj është siguria jonë”.
“Dhe tani po ecni me shpejtësi të jashtëzakonshme drejt bashkimit me Bashkimin Evropian. Ne kemi qëndruar me ju që nga dita e parë dhe do të vazhdojmë ta bëjmë këtë për aq kohë sa të duhet. Slava Ukraini [Lavdi Ukrainës]”, shtoi ajo.
Ukraina u bë kandidate zyrtare për anëtarësim në BE në qershor 2022, katër muaj pas pushtimit të plotë të vendit nga Rusia dhe përpjekjes së saj të dështuar për të rrëzuar qeverinë në Kiev.
Raundi i parë i negociatave zyrtare për anëtarësim u mbajt në qershor të këtij viti.
