Me 77 vota pro, është miratuar sot në Kuvend marrëveshja Shqipëri-Itali për emigrantët.
Në kohë rekord, u dhanë 74 kartonë jeshilë edhe për projektligjin e zonave të mbrojtura.
Nga rendi i ditës, ashtu siç u raportua më herët, u hoq projektligji për Amnistinë Penale.
Kjo sepse socialistët nuk kanë arritur dakordësi me opozitën për të siguruar votat e nevojshme.
Që ky ligj të kalojë nevojiten 84 vota
“Me 74 vota pro hiqet nga rendi i ditës projektligji për Amnistinë Penale”, tha Nikolla në nisje të seancës plenare.
Ashtu si herët e shkuara edhe seanca e kësaj të Enjteje u shoqërua me zhurmë dhe debate mes palëve politike. Deputetët e PD vijuan me aksionin e tyre duke bllokuar foltoren. Seanca zgjati vetëm 8 minuta.
Ajo që ra në sy ishin 3 votat pro të deputetëve të PDIU-së, për të dy projektligjet që u miratuan.
Kujtojmë se ligji për Amnistinë Penale po diskutohet prej muajsh dhe siç ndodh shpesh edhe me propozime të tjera të PS-së, ka pasur kundërshti nga pala opozitare.
Këtë ligj, që parimisht shihet si akt humanizmi i deputetëve të Kuvendit, kreu i grupit të PD Gazment Bardhi e cilësoi dje jo transparent dhe pa draft të përbashkët. Ai theksoi se asnjë deputet i PD nuk do e votojë këtë projektligj.
Votat e deputetëve të Lulzim Bashës ishin e vetmja shpresë për mazhoritarët, por nuk u arrit asnjë konsensus.
Basha deklaroi dje se ky vendim u mor për shkak të pranimit të pjesshëm të amendamentit të Enkeled Alibeajt për Amnistinë Penale te “Ligjet”.
Ndërkohë pavarësisht se sot u miratua, debate ka pasur edhe për marrëveshjen e emigrantëve që pritet të vijnë në Lezhë.
Pavarësisht se opozita e dërgoi çështjen në Gjykatë Kushtetuse, kjo e fundit i dha “Ok” marrëveshjes me shtetin fqinj
