Një votim për ndalimin e shitjeve të automjeteve me motor me djegie në Bashkimin Evropian, nga viti 2035, është shtyrë, tha sot një zëdhënës i presidencës suedeze të BE-së.
”Vendet e BE-së do ta rikthehen çështjes në kohën e duhur”, shtoi ai.
Votimi, i planifikuar fillimisht për të martën, u konsiderua një formalitet pasi vendet e BE-së dhe Parlamenti Evropian kishin arritur konsensus mbi këtë çështje tetorin e kaluar.
Megjithatë, ministri gjerman i Transporteve, Volker Wissing shprehu kundërshtimin ndaj ndalimit të shitjeve duke kërcënuar se Berlini nuk do ta mbështeste ndalimin.
Ai argumentoi se Komisioni Evropian nuk ka ndjekur ende një projektligj plotësues se si makinat dhe furgonët që punojnë me karburante neutrale ndaj klimës mund të regjistrohen ende në BE pas vitit 2035.
Propozimi i premtuar ishte pjesë e një marrëveshjeje të arritur verën e kaluar që synonte të merrte mbështetjen e FDP-së për ndalimin e shitjeve.
Pa mbështetjen e Gjermanisë, një shumicë nuk kishte gjasa, duke shkaktuar vonesën e votimit.
Ministri gjerman i Financave Christian Lindner, ishte në mesin e atyre anëtarëve të qeverisë që shprehën mbështetje për kundërshtimin e Wissing.
”Automjetet me djegie të regjistruara rishtazi do të ishin një përjashtim pas vitit 2035”, tha Lindner.
Megjithatë, në mbarë botën, duke qenë se kjo teknologji do të vazhdojë të mbetet e rëndësishme, një eksportues makinash si Gjermania duhet të ruajë ekspertizën e nevojshme në këtë fushë.
Planet për të reduktuar emetimet e CO2 që dëmtojnë klimën nga furgonat dhe makinat e reja me 100% deri në vitin 2035 – që do të thotë një ndalim i shitjeve – janë pjesë e një pakete më të madhe për të trajtuar ndryshimet klimatike.
BE-ja dëshiron të reduktojë emetimet e saj të gazeve serrë me të paktën 55% deri në vitin 2030 krahasuar me nivelet e vitit 1990 dhe të arrijë neutralitetin klimatik në vitin 2050.
