Presidenti turk, Recep Tayyip Erdoğan, ka deklaruar se klima ekonomike në Turqi do të jetë “krejtësisht ndryshe” këtë verë kur të vendoset ekuilibri në sistemin financiar, raporton Anadolu Agency (AA).
Në një takim me anëtarë të medias dhe akademisë në zyrën presidenciale në Pallatin Dolmabahçe në Stamboll, presidenti Erdoğan u bëri thirrje akademikëve dhe ekonomistëve që të kontribuojnë në modelin e ri ekonomik të qeverisë duke formuluar zgjidhje dhe duke ofruar udhëzime.
Erdoğan tha se Turqia ka nisur një ndryshim historik në politikën ekonomike, duke shtuar se ka lënë mënjanë kuptimin klasik të kontrollit të inflacionit me norma të larta interesi.
“Përkundrazi, ajo ka miratuar një politikë ekonomike të bazuar në zhvillimin e vendit me investime, punësim, prodhim, eksporte dhe me suficitin aktual”, tha presidenti turk.
Duke theksuar se rezervat valutore të Bankës Qendrore të Turqisë aktualisht janë mbi 115 miliardë dollarë, Erdoğan tha: “Kjo shumë do të jetë në një pozicion shumë më të mirë. Sot, Turqia ka infrastrukturën që i nevojitet në çdo fushë, nga arsimi deri në shëndetësi, nga siguria deri në ligj, nga industria deri në turizëm”.
Qeveria turke ka argumentuar se rritja e kohëve të fundit në kurset valutore injoron bazat e forta ekonomike të vendit, duke fajësuar çmimet e larta të rezervave dhe faktorët globalë.
Presidenti Erdoğan theksoi se përfitimet e qasjes së re të Turqisë do të jenë të qarta në tre deri në gjashtë muajt e ardhshëm.
