Talebanët të cilët përparojnë në Afganistan të mërkurën hynë në Qala-e-Nau, kryeqyteti i provincës perëndimore Badghes në kufi me Turkmenistanin, që u bë provinca e parë në vendin e shkatërruar nga lufta, ku talebanët hynë në kryeqendër pas tërheqjes së SHBA-së, transmeton Anadolu Agency (AA).
Në një video-deklaratë, guvernatori i provincës Hassamuddin Shams tha se të gjithë anëtarët e forcave të sigurisë janë vendosur për të ruajtur provincën dhe së shpejti do të zbrapsin kryengritësit që kanë hyrë në qytet. Me veshje ushtarake, guvernatori tha se forcat do të mbronin Qala-e-Nau ndërsa në prapavijë mund të dëgjoheshin zhurma të një përplasjeje të ashpër me armë.
Sipas të përditshmes lokale “Etilat Roz”, një numër zyrtarësh lokalë të sigurisë së bashku me rreth 100 forca sigurie u dorëzuan tek talebanët natën përpara se kryengritësit të sulmonin Qala-e-Nau, gjë që rezultoi shkatërruese për forcat që mbronin kryeqytetin e provincës.
Ndërkohë, llogaritë e mediave sociale pro-talebane kanë ndarë pamje të kolonave të kryengritësve të armatosur që marshojnë në qytet.
Që kur presidenti i SHBA-së, Joe Biden njoftoi planin për tërheqje nga Afganistani në maj, talebanët kanë pushtuar mbi 100 rrethe ndërsa forcat afgane kanë pretenduar të kenë vrarë afër 200 kryengritës në ofensivat kundër-terrorizmit në baza ditore.
