Një 37-vjeçar ka mbetur i plagosur në Fier për shkak të një konflikti pronësie.
Ngjarja ka ndodhur mëngjesin e sotëm në fshatin Vreshtas, ku shtetasi Haredin Nazëraj, 66 vjeç, pas një konflikti për motive të dobëta, ka plagosur me armë gjahu shtetasin Klement Nazëraj, 37 vjeç, i cili ndodhet në spitalin e Fierit nën kujdesin e mjekëve.
Menjëherë në vendngjarje shkuan shërbimet e Policisë, të cilët bënë të mundur kapjen e autorit të dyshuar dhe shoqërimin e tij në Komisariatin e Policisë Fier.
Policia ka sekuestruar gjithashtu në cilësinë e provës materiale armën e gjahut.
Dyshohet se dy të afërmit janë konfliktuar për të mbjellat dhe më pas sherri ka degjeneruar dhe 66-vjeçari ka marrë armën duke e qëlluar kushëririn e tij.
Në vijim të veprimeve hetimore, specialistët për Hetimin e Krimeve në Komisariatin e Policisë Fier bënë arrestimin në flagrancë të shtetasit Haredin Nazëraj për veprën penale “Plagosja e rëndë me dashje”.
Materialet do i kalojnë Prokurorisë Fier, për veprime të mëtejshme procedurale.
