Një avion ushtarak rus, duke evakuuar 80 persona nga Kina e goditur nga koronavirusi, zbarkoi sot në qytetin siberian Tyumen.
Ministria ruse e Mbrojtjes në një deklaratë tha se një staf mjekësor shoqëroi pasagjerët, qytetarë të Rusisë, Bjellorusisë, Armenisë dhe disa vendeve tjera ish-sovjetike, në avionin e Forcave Ajrore.
“Midis qytetarëve të evakuuar nuk u identifikua asnjë rast me infeksion”, thuhet në deklaratë.
Mjekët ushtarakë raportuan “gjendjen e kënaqshme të atyre që kishin ardhur nga Kina”, thuhet më tej.
Të gjithë të evakuuarit do të jenë në karantinë për 14 ditë, periudha e inkubacionit të koronavirusit.
Të martën, Rusia dërgoi dy avionë për evakuim nga Kina ndërsa avioni i dytë pritet të kthehet në Rusi.
Si pasojë e virusit deri më tani 491 persona e kanë humbur jetën në Kinë ndërsa mbi 24 mijë të tjerë janë prekur nga virusi.
Koronavirusi, i cili ka origjinën në qytetin qendror Wuhan, thuhet se është transmetuar tek njerëzit nga kafshët, veçanërisht lakuriqët.
