Në Maqedoninë e Veriut gjatë 24 orëve të fundit janë regjistruar 386 raste të tjera me koronavirusin e ri (COVID-19), numër më i madh i rasteve njëditore që nga shpërthimi i pandemisë, ku numri i përgjithshëm i rasteve në vend ka shkuar në 20 163.
Kjo është dita e tretë me radhë që shënohen numra rekord, pasi të mërkurën u regjistruan 317 raste, ndërsa dje 364.
Ministria e Shëndetësisë bëri të ditur se 6 persona kanë humbur jetën në 24 orët e fundit, dhe numri i përgjithshëm i viktimave të shkaktuara nga ky virus u rrit në 781.
Instituti i Shëndetit Publik regjistroi dje 154 pacientë të tjerë të shëruar, duke e çuar në 16 009 numrin e përgjithshëm të pacientëve të shëruar në vend, ndërsa aktualisht numri i rasteve aktive me koronavirus është 3 373.
Ministria e Shëndetësisë informon se në 24 orët e fundit janë kryer 2 267 teste të dyshuara për COVID-19, ndërsa deri më tani janë kryer gjithsej 203 779 teste.
Ministri i Shëndetësisë së Maqedonisë së Veriut, Venko Filipçe, në një konferencë për media dje paralajmëroi rivendosje të disa masave për parandalimin e përhapjes së koronavirusit, duke theksuar se vërehet rritje e numrit të rasteve të reja.
