Kryetari i AAK-së, Ramush Haradinaj ka arsyetuar vizitën e djeshme të tij tek deputeti i Nismës Haxhi Shala. Ai tha se ka qenë koincidencë vizita e tij e përbashkët me presidentin, Hashim Thaçi në shtëpinë e deputetit për të bindur atë të votojë qeverinë Hoti.
Ndërsa për abstenimin e deputetes Donika Kadaj-Bujupi ai tha se nuk ka qenë në dijeni se brenda grupit parlamentar të tyre mund të ketë kundërshtime për qeverinë Hoti.
“Presidenti ka raporte të kahershme miqësore me Haxhi Shalën edhe unë i kam nga ana ime. Koincidenca janë këto. Shala ka qenë zëvendëskomandant në rajonin e Prizrenit, kur unë kam qenë komandant i TMK-së, kjo ka ndodhur…unë i thash që e qes votën për këtë qeveri, a e qet edhe ti, ai tha që po”, tha ai.
Haradinaj u shpreh se qeveria Hoti ka mundësi që të shkojë me mandat të plotë qeverisës.
“Ka mundësi reale që kjo qeveri të shkojë me mandat të plotë” , tha ai.
