Trigliceridet janë një lloj yndyre që trupi përdor si rezervë energjie, shkruan persinaltrainer.it.
Kur hamë, organizmi i shndërron kaloritë që nuk i duhen menjëherë në trigliceride, të cilat më pas ruhen në qelizat dhjamore.
Pas moshës 60-vjeçare, mund të vëresh se këto vlera priren të rriten më lehtë krahasuar me më parë.
Kjo ndodh sepse metabolizmi ngadalësohet dhe aftësia e trupit për të përpunuar yndyrnat dhe sheqernat ndryshon.
Të shohësh një vlerë të lartë në analizat e gjakut mund të shkaktojë shqetësim, por është e rëndësishme të dish se këta tregues shpesh janë pasqyrim i zakoneve tona të përditshme dhe mund të përmirësohen me ndryshime të vogla në stilin e jetesës.
Për shumicën e të rriturve, vlerat e triglicerideve konsiderohen normale kur qëndrojnë nën 150 mg/dL.
Nëse analizat tregojnë një vlerë midis 150 dhe 199 mg/dL, atëherë konsiderohesh në një nivel “borderline”, pra në kufirin e lartë.
Kur vlera kalon 200 mg/dL, flitet për hipertrigliceridemi të mirëfilltë.
Pas të 60-ave, monitorimi bëhet edhe më i rëndësishëm sepse trigliceridet e larta, sidomos kur shoqërohen me kolesterol LDL (“i keqi”) të lartë ose HDL (“i miri”) të ulët, rrisin rrezikun për formimin e pllakave në arterie.
Kjo mund të rëndojë punën e zemrës dhe sistemit qarkullues.
Nëse vlerat kalojnë 500 mg/dL, rreziku kryesor lidhet me pankreasin, i cili mund të inflamohet dhe të shkaktojë një gjendje të dhimbshme të quajtur pankreatit.
