Turqia po përballet me një krizë të re politike, pasi policia turke ndërhyri me forcë në selinë qendrore të Partisë Popullore Republikane, CHP, partia më e madhe opozitare në vend.
Forcat e rendit përdorën gaz lotsjellës dhe thyen barrikadat e improvizuara për të larguar drejtuesit e shkarkuar të partisë nga godina qendrore në Ankara.
Brenda selisë u panë tensione dhe përplasje, ndërsa mbështetësit e opozitës hodhën objekte në drejtim të hyrjes kryesore. Sipas raportimeve, nuk ka persona të lënduar.
Tensionet shpërthyen pasi një gjykatë turke anuloi zgjedhjen e liderit të CHP-së, Ozgur Ozel, duke argumentuar se në kongresin e vitit 2023 kishte pasur parregullsi.
Në vend të tij, gjykata riktheu ish-kryetarin Kemal Kilicdaroglu, kandidatin që humbi zgjedhjet presidenciale përballë Recep Tayyip Erdogan.
Ozel e cilësoi vendimin si “grusht gjyqësor” dhe deklaroi se opozita është “nën sulm”. Pas ndërhyrjes së policisë, ai udhëhoqi mijëëra mbështetës në një marshim drejt parlamentit turk.
Mbështetësit e tij brohoriten slogane kundër Kilicdaroglu, duke e akuzuar për bashkëpunim me pushtetin. Ndërkohë, deputetët e CHP-së e rizgjodhën Ozelin si drejtues të grupit parlamentar të partisë.
Nga ana tjetër, qeveria turke mohon akuzat për ndërhyrje politike në drejtësi, duke deklaruar se gjykatat veprojnë në mënyrë të pavarur.
