Presidenti i SHBA-së Donald Trump kritikoi ashpër sërish NATO-n për mosmbështetjen e Shteteve të Bashkuara të Amerikës në luftën me Iranin.
Trump u tha gazetarëve në Shtëpinë e Bardhë se ishte “shumë i zhgënjyer” nga NATO-ja.
Ai tha se lufta kishte lënë një gjurmë në NATO që nuk do të zhdukej kurrë, duke shtuar se aleanca e mbrojtjes ishte një “tigër prej letre”.
Ai akuzoi aleatët se kishin ofruar mbështetje shumë vonë. “Nuk kemi nevojë për ndihmë pasi të fitojmë”, tha Trump.
Trump gjithashtu kritikoi aleatët e Paqësorit, duke thënë se ata kishin dështuar të ndihmonin Uashingtonin në luftën me Iranin.
“Japonia nuk na ndihmoi. Australia nuk na ndihmoi, Koreja e Jugut nuk na ndihmoi. Dhe pastaj kur të arritëm te NATO, NATO nuk na ndihmoi”, tha Trump.
Trump, kohët e fundit ka shprehur zhgënjim të fortë që aleatët janë distancuar nga ndërhyrja ushtarake e SHBA-së në Iran dhe gjithashtu që nuk kanë treguar gatishmëri gjatë luftës – për të marrë pjesë në ndonjë mision të mundshëm ushtarak për të mbrojtur dërgesat e naftës dhe gazit përmes Ngushticës së Hormuzit.
Sipas deklaratës së fundit, presidenti amerikan po shqyrton mundësinë e tërheqjes së SHBA-së nga NATO.
Deklarata e tij erdhi përpara një vizite të sekretarit të përgjithshëm të NATO-s, Mark Rutte, në Uashington më vonë këtë javë.
