Ashtu siç ishte paralajmëruar, Partia Demokratike ka ngritur padi në Gjykatën Kushtetuese për zgjedhjen e Avokatit të Popullit, Endrit Shabani, me pretendimin se përbën shkelje të Kushtetutës dhe rregullores së Kuvendit të Shqipërisë.
Kujtojmë se në mes të kaosit e polemikave, Shabani u votua si Avokat i Popullit, në seancën plenare të 18 dhjetorit 2025.
Ai siguroi 85 vota pro, pa asnjë abstenim dhe me vetëm 3 vota kundër, në një seancë ku vendet e deputetëve të opozitës mbetën bosh, pasi ata u larguan para fillimit të votimit.
Vendimi u mor në një klimë të tensionuar politike, pasi Partia Demokratike ndryshoi disa herë qëndrimet e saj për këtë proces.
Argumenti i tyre ishte se procesi nuk kishte pasur konsensus politik dhe se mazhoranca po e çonte përpara në mënyrë të njëanshme.
Ndërkohë, mazhoranca socialiste e ka mbështetur thuajse plotësisht kandidaturën e Shabanit. Me këtë votim u mbyll periudha 3-vjeçare e zgjatur e ushtrimit të detyrës nga Erinda Ballanca, e cila qëndroi në krye të institucionit përtej mandatit zyrtar, për shkak të mungesës së marrëveshjes mes palëve politike.
Rezultatet e votimit të kandidaturave nga Kuvendi, si më poshtë:
Tartar Bazaj – 1 votë pro, 79 abstenim, 7 kundër
Aranita Brahaj – 4 vota pro, 76 abstenim, 7 kundër
Skënder Haluci – 1 votë pro, 72 abstenim, 14 kundër
Adriana Kalaja – 0 vota pro, 69 kundër, 17 abstenim
Besim Ndregjoni – 0 vota pro, 61 abstenim, 25 kundër
Endrit Shabani – 85 vota pro, 0 abstenim, 3 kundër
