Policia e Shtetit njofton se ka finalizuar operacionin policor të koduar “Operacionalja 75”, duke arrestuar dy të shpallur në kërkim nga GJKKO.
Policia e Shtetit njofton se dy të kërkuarit u kapën të armatosur me armë zjarri pistoleta dhe armë gjahu.
Gjatë operacionit u sekuestruan në cilësinë e provës materiale dy armë zjarri pistoleta, dy armë gjahu, dy radio si ato të policisë, një jelek antiplumb dhe municion luftarak.
“Në vijim të operacioneve të njëpasnjëshme të zhvilluara nga Drejtoria e Forcës së Posaçme Operacionale në Departamentin e Policisë Kriminale në Policinë e Shtetit, për lokalizimin, kapjen dhe ndalimin së shtetasve të shpallur në kërkim, bazuar dhe në informacionet e siguruara në rrugë operative, u finalizua operacioni policor i koduar “Operacionalja 75”.
Gjatë operacionit me shkallë të lartë rrezikshmërie, në një terren të vështirë në zonën e Fushë-Kuqes pranë lumit, në një banesë, shërbimet e Drejtorisë së Forcës së Posaçme Operacionale bënë të mundur identifikimin, lokalizimin dhe ndalimin e dy shtetasve me rrezikshmëri të lartë shoqërore, konkretisht: A. Xh., 42 vjeç, banues në Fushë-Krujë, dhe E. M., 47 vjeç, banues në Mamurras, të shpallur në kërkim, pasi GJKKO ka caktuar ndaj tyre masën e sigurisë “Arrest me burg””, thuhet në njoftim.
Policia e Shtetit njofton se të ndaluarit akuzohen për veprat penale: “Sigurimi i kushteve dhe mjeteve për të kryer vrasje, në bashkëpunim të posaçëm të grupit kriminal”; “Grup i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”.
Gjatë kontrollit, forcat e posaçme operacionale gjetën dhe sekuestruan në cilësinë e provës materiale dy armë zjarri tip pistoletë brenda në çanta marsup, si dhe dy armë gjahu, bashkë me municion luftarak, pa leje.
Po gjatë kontrollit u gjetën edhe dy radio ndërlidhëse si ato të policisë dhe një jelek antiplumb. Vazhdon puna për dokumentimin dhe gjetjen e provave të tjera.
