Sot ishte parashikuar të mbahej seanca paraprake në Gjykatën e Posaçme Kundër Korrupsionit dhe Krimit të Organizuar (GJKKO) për kryebashkiakun Erion Veliaj, por ajo nuk u zhvillua.
Raportohet se gjykata ka caktuar seancën e radhës më 21 tetor 2025, po në orën 09:00. Shtyrja e seancës u bë pas kërkesës së disa mbrojtësve të të pandehurve, të cilët kërkuan më shumë kohë për përgatitje.
Ky vendim lidhet me bojkotin e ndërmarrë nga Dhoma Kombëtare e Avokatisë, pas ngjarjes së rëndë të vrasjes së gjyqtarit Astrit Kalaja, një situatë që ka trazuar komunitetin e profesionistëve të drejtësisë dhe ka shkaktuar pezullime në disa procedura gjyqësore.
Kujtojmë se Erion Veliaj ndodhet në qeli që prej 10 shkurtit të këtij viti, i akuzuar për shkelje të ligjit në ushtrimin e detyrës publike dhe përfshirje në veprime korruptive gjatë kohës si kryebashkiak.
Ndërkaq, Gjykata e Lartë ka vendosur të shtyjë shqyrtimin e rekursit të ish-presidentit Ilir Meta për ndryshimin e masës së sigurisë, duke caktuar datën 16 tetor.
Seanca në dhomë këshillimi, që ishte planifikuar të zhvillohej dje, në orën 10:00, u shty për javën tjetër, për shkak të mbledhjes së gjyqtarëve në Këshillin e Lartë Gjyqësor.
