Kolegji Zgjedhor, ka rrëzuar ditën e sotme, kërkesën e kandidatit për deputet të Partisë Demokratike – Aleanca Shqipëria Madhështore, Ilir Alimehmeti.
Ky i fundit ka kërkuar që të rinumërohen votat preferenciale të demokratëve në qarkun e Tiranës.
Argumenti i Kolegjit Zgjedhor ka qenë se nuk ka pasur bazë ligjore për ankimimin e Alimehmetit, i cili pretendon se ka pasur parregullsi.
Kujtojmë se Komisioni i Ankimimeve dhe Sanksioneve rrëzoi më 30 maj kërkesën e Alimehmetit dhe tre kandidatëve të tjerë demokratë të listës së hapur të cilët kërkuan rinumërim.
Me shumicë votash ata ndërprenë mundësinë e shqyrtimit të ankimit në seancë publike, pasi sipas tyre, kërkesa nuk duhej paraqitur në mënyrë individuale, por në emër të subjektit që përfaqësojnë.
Këtë vendim e ka cilësuar të drejtë edhe kreu i Partisë Demokratike, Sali Berisha, i cili u ka premtuar kandidatëve të tij transparencë, por pasi të shqyrtohet ankimimet për pavlefshmërinë e zgjedhjeve.
Më 12 Qershor Kolegji Zgjedhor do të shqyrtojë edhe ankesat e Shkëlqim Shehut, kandidatit të PD-së në Kukës dhe Partisë Balli Kombëtar për Durrësin, të cilët kërkojnë po ashtu rinumërim të votave.
