Për shkak të rritjes së temperaturave ditët e fundit, është rritur numri i zjarreve në ambiente të hapura. Vetëm gjatë fundjavës së kaluar janë regjistruar 60 zjarre, njoftoi Qendra për Menaxhimin e Krizave në Maqedoninë e Veriut (QMK).
Sipas QMK-së, deri në mesnatë, 9 zjarre ishin ende aktive. Dy zjarre janë në komunën e Prilepit, një në fshatin Krushevicë dhe një në fshatin Lopaticë. Po ashtu, një zjarr është aktiv në komunën e Demir Hisarit, ndërmjet fshatrave Rastojcë dhe Koçishtë.
Sipas Qendrës për Menaxhimin e Krizave një zjarr tjetër është aktiv në komunën e Novo Sellës, në malet e Ograzhden, afër fshatit Sushicë. Po ashtu, ka zjarr në komunën e Gjevgjelisë, në fshatin Kovanec, dhe në Ohër, në fshatin Soshani në Debërcë.
Në komunën e Çashkës, ka zjarr mes fshatrave Teovo dhe Plevenje, ndërsa në Saraj dhe Zhelinë ka gjithashtu zjarre aktive. Zjarri i fundit është në komunën e Tetovës, mbi fshatin Veshallë në Malin Sharr.
QMK ka apeluar për kujdes të shtuar gjatë qëndrimit në ambiente të hapura dhe i bën thirrje fermerëve të mos djegin kashtën dhe blegtorëve të mos djegin kullotat.
