Zjarret, Çupi: Ministrja Xhaçka të thirret urgjent nga Prokuroria

Ish-deputetja e Partisë Demokratike, Dhurata Çupi nga selia blu tha se ministrja e Mbrojtjes Olta Xhaçka duhet të thirret urgjent nga Prokuroria. Sipas saj, përmes deklaratës së bërë nga kjo e fundit pak më parë, tregoi qartë se ministrja ka patur informacione për zjarret e rëna në vend.

Ajo tha se kryeministri Rama ka kapur prokurorinë, gjykatat dhe nuk bën aspak përpjekje për të arrestuar personat, të cilët vijojnë të djegin sipërfaqe të tëra me pyje.

“Olta Xhakca të thirret urgjent nga Prokuroria. Ajo ka treguar se ka patur dijen për zjarret. Deklaratat dhe akuzat e saj janë qesharake. Edi Rama ka nën kontroll, policinë, prokurorinë dhe gjykatat. Edi Rama duhet të zbulojë një orë e më parë autorët e zjarreve në vend”, tha mes tjerash ajo.

Deklarata e plotë:

Olta Xhaçka duhet të thirret urgjent në prokurori! Ajo ka deklaruar se ka dijeni për akte të rënda kriminale nëpërmjet zjarrëvënies së qëllimshme. Ministrja e Mbrojtjes ka detyrimin që çdo të dhënë që disponon për autorët e këtyre akteve kriminale t’i depozitojë në prokurori. Deklaratat dhe akuzat qesharake të Olta Xhaçkës, që ngjajnë si dy pika uji me akuzat e shefes së saj politike, Elisa Spiropali, për tritolin në shtyllat e tensionit të lartë, u provojnë shqiptarëve se drejtohen nga një qeveri e destabilizuar dhe nga një kryeministër me qëllime të mbrapshta. Edi Rama ka nën kontroll Policinë, Prokurorinë, shërbimin sekret, gjykatat dhe çdo institucion që është përgjegjës për zbulimin e autorëve të akteve kriminale dhe dënimin e tyre.

Në vend që të bëhet qesharak dhe të shpallë opozitën armik për çdo dështim të tij, Edi Rama duhet të zbulojë pa vonesë ata që kanë vendosur zjarret në zona të ndryshme të vendit. Përvoja e afërt gjatë qeverisë së Edi Ramës tregon se zjarrin Shqipërisë ia kanë vënë trafikantët për mbjelljen e hashashit dhe asnjëri prej tyre nuk ka dalë para drejtësisë.

Shërbimi qesharak i Olta Xhaçkës ndaj Edi Ramës nuk e ndalon dot zbardhjen e dosjes 184, prej të cilës shqiptarët do të mësojnë se kush janë zjarrëvënësit e vërtetë të Shqipërisë, ata që vënë çdo ditë në rrezik jetën dhe pronën e qytetarëve, që po pengojnë integrimin europian të Shqipërisë. Partia Demokratike shpreh keqardhjen që Partia Socialiste ka ulur përfaqësimin e saj në nivelin e inteligjencës dhe ndershmërisë së Oltës, Taulantit dhe Elisës. Ne e dimë se brenda PS ka personalitete që mund ta ndihmojnë partinë e tyre në këtë ditë të hallit ku ka rënë, duke kontribuar, njëkohësisht, në shkëputjen e lidhjeve të PS me krimin, e cila është bërë pengesë për të ardhmen europiane të vendit.

- ISLAMSHOP.CH -spot_img

LEXO MË SHUMË

Së fundi