Prokuroria e Tiranës përfundoi hetimet dhe dërgoi për gjykim 8 shtetas shqiptarë dhe kosovarë të cilët trafikuan armë nga Kosova në Shqipëri.
Konkretisht, Prokuroria Tiranë dërgoi për gjykim të pandehurit “T. Sh., G Ll., E.M. dhe A. M., të akuzuar për veprat penale “Prodhimi dhe mbajtja pa leje e armëve luftarake dhe municionit”, dhe shtetasit E.Th. M.K. B.K. dhe V.O, për veprën penale të “Trafikimi i armëve dhe i municionit”.
Tre prej tyre, shtetas kosovarë E.Th., B.K., dhe M.K. të cilët me kërkesën e prokurorisë u shpallën fajtorë dhe u dënuan përkatësisht: 8 vite burg të shtetasit B.K. për veprën penale “Trafikimi i armëve dhe municionit”; 6 vite e 8 muaj burg të shtetasit M.K. për kryerjen e veprës penale “Trafikimi i armëve dhe municionit”; 7 vite burg të shtetasit E.Th. për kryerjen e veprës penale “Trafikimi i armëve dhe municionit”.
Ndërkohë sipas Prokurorisë së Tiranë për pesë shtetasit e tjerë, çështja u dërgua në gjyq për veprat penale “Prodhimi dhe mbajtja pa leje e armëve luftarake dhe municionit”, ndërsa për shtetasin V.O. për veprën penale “Trafikimi i armëve dhe i municionit”.
Hetimet nisën pas sinjalizimeve se shtetasit B.K. dhe M.K. kanë blerë një sasi të konsiderueshme armë zjarri të llojit pistoletë “Zoraki” me qëllim trafikimin e tyre drejt territorit të Shqipërisë. Hetimet e zhvilluara nga skuadra e përbashkët hetimore midis Shqipërisë dhe Kosovës, me mbështetjen e Eurojust, çuan në një operacion ndërkombëtar ku u arrestuan 16 persona dhe u sekuestruan 64 armë zjarri dhe municione në të dy shtetet.
Sipas Prokurorisë, veprimet hetimore, të shoqëruara edhe me përgjimet ambientale për blerjen e simuluar vërtetuan se këta shtetas kanë konsumuar veprën penale për të cilën akuzohen.
