Tensione u shënuan sot në sallën e Kuvendit gjatë nisjes së prezantimit të raporteve të Komisionit të Posaçëm për Reformën Administrativo-Territoriale, pasi deputetët e opozitës bllokuan foltoren dhe penguan vijimin e raportimit nga pala e mazhorancës.
Pas përfundimit të diskutimeve për procedurë dhe njoftimit të nisjes së prezantimit të raporteve përkatëse të Partisë Socialiste dhe Partisë Demokratike për reformën territoriale, deputetët e opozitës u pozicionuan në foltoren e Kuvendit, duke mos lejuar vijimin e fjalës nga bashkëkryetari i komisionit, Arbjan Mazniku.
Kryetari i Kuvendit, Niko Peleshi, u kërkoi deputetëve të lejonin vijimin normal të seancës dhe u la kohë bashkëkryetarëve të komisionit, Arbjan Mazniku dhe Luçiano Boçi, për të paraqitur gjetjet e punës së komisionit.
Për shkak të bllokimit të foltores dhe pamundësisë për të vijuar raportimin, Peleshi njoftoi një pushim prej 5 minutash deri në lirimin e foltores.
Debatet për Reformën Administrativo-Territoriale nisën që në fillim të seancës, pasi opozita kërkoi zgjatjen e mandatit të Komisionit të Posaçëm me tre muaj, kërkesë që u rrëzua nga mazhoranca.
Kreu i grupit parlamentar të Partisë Socialiste, Taulant Balla, deklaroi se mandati i komisionit ka përfunduar dhe se ai nuk mund të zgjatet, duke argumentuar se në seancën e sotme do të paraqiten vetëm gjetjet e punës së bërë dhe jo miratimi i një reforme të re territoriale.
Ndërkohë, opozita pretendon se objektivat e komisionit nuk janë përmbushur dhe se raportet duhet të ishin shqyrtuar në një proces më të gjatë konsultimi.
Seanca plenare vijon mes tensioneve politike, ndërsa jashtë Kuvendit protestuesit dhe forcat e policisë janë përfshirë më herët në përplasje gjatë tubimit të qytetarëve.
