Deputetja e PD-së, Jorida Tabaku ka reaguar lidhur me projektbuxhetin 2026 duke u shprehur se rritja ekonomike që pretendohet nga dy sektorë nuk reflektohet në realitetin e familjeve shqiptare.
Tabaku thekson nëpërmjet një videomesazhi në rrjetet sociale se “qeveria pranoi rritjen e çmimeve. Që rritja e çmimeve e produkteve të paktën e atyre të domosdoshme të shportës nga 30% deri në 60%, është bërë barrë e rëndë për qytetarët dhe familjet shqiptare”.
“Qeveria premtoi nga ana tjetër një rritje pagash çikërrima. E njëjta gjë ndodhi dhe me pensionet që nuk kanë absolutisht asnjë lidhje me realitetin që përjetojnë sot familjet shqiptare. Sot ekonomia shqiptare është e kapur në pak duar dhe prodhon për pakicën. Ka dy sektorë që pretendojnë se ka rritje më të madhe ekonomike por kjo nuk reflektohet as në xhepat e qytetarëve shqiptarë, as në realitetin e familjeve shqiptare. Nuk reflektohet absolutisht as edhe në këtë buxhet”, deklaron deputetja e PD-së.
Ajo shtoi se kemi nevojë të ndryshojmë faktin që sot ekonomia duhet të punojë për shumicën.
“Nuk mundet çikërrimat e fundit të vitit të konsiderohet mbështetje për familjet shqiptare. Nuk mundet që familjet shqiptare që shpenzojnë 40% të buxhetit të tyre vetëm për shpenzime të jetesës”, shprehet Jorida Tabaku.
