Një i ri është arrestuar nga policia e Shkodrës pasi ka shantazhuar nëpërmjet rrjeteve sociale një të mitur 17 vjeç nga qyteti i Lushnjës.
Policia njofton se pas denoncimit në një emision investigativ, policia e Shkodrës në bashkëpunim me shërbimet e Stacionit të Policisë Velipojë, kanë organizuar punën për identifikimin dhe kapjen e autorit.
“Si rezultat i veprimeve të shpejta profesionale dhe hetimore u bë i mundur identifikimi, kapja dhe ndalimi i shtetasit S. H., 21 vjeç, banues në fshatin Vrakë, për veprat penale “Përndjekja”, “Shtrëngimi me anë të kanosjes ose dhunës për dhënien e pasurisë” dhe “Përdorimi me keqdashje i thirrjeve telefonike”, njofton policia.
Për dokumentimin ligjor të këtij rasti, është bashkëpunuar dhe me policinë e Fierit.
