Pak ditë më parë, Komisioni Qendror i Zgjedhjeve (KQZ) vulosi përfundimisht rezultatin zgjedhor të 11 majit. Pikërisht për këtë u pyet sot, 1 shtator, kryedemokrati Sali Berisha para ambienteve të SPAK.
Cila do te jetë strategjia e opozitës tanimë përgjatë sesionit të ri parlamentar?
“Çdo hap do të merret në kolegjialitet të plotë, në debate të hapura me deputetët dhe institucionet e PD-së, por u bëj thirrje mediave të qëndrojnë fuqishëm sepse armiku numër një i shqiptarëve sot është censura.
Mbi 90% e mediave për shkak të korruptimit kokë e këmbë të tyre, bëjnë gjithçka për të mbuluar të zezat e qeverisë, populli mbetet në errësirë.
Qytetarët të përdorin sa më shumë rrjetet sociale dhe gazetarët të intensifikojnë denoncimet e tyre.
Opozita shqiptare betejë në të gjitha frontet, do bëjmë gjithçka për t’u kthyer shqiptarëve votën e lirë”, u përgjigj Berisha.
Kështu, ai konfirmoi se Partia Demokratike do vijojë me të njëjtin qëndrim kundërshtues për mënyrën si u zhvilluan zgjedhjet parlamentare.
Nga zgjedhjet e 11 majit, Partia Socialiste fitoi 83 mandate, aleanca e Partisë Demokratike 50 mandate, Partia Socialdemokrate tre mandate, Partia Mundësia dy mandate ndërsa Lëvizja Bashkë dhe Nisma Shqipëria Bëhet nga një mandat.
Kujtojmë se sezoni i shkuar parlamentar është dominuar nga tensionet në sallën e Kuvendit dhe jashtë saj. Që nga akuzat e rënda në foltore e deri te djegia e karrigeve jashtë Parlamentit apo protestat e thirrura nga opozita.
