Dega e Partisë Demokratike në Kavajë ka përfunduar procesin zgjedhor për drejtimin e saj lokal, një proces që është cilësuar nga drejtuesit dhe pjesëmarrësit si shembullor dhe demokratik.
Nga votimi i zhvilluar në qytet, Rudin Hylviu është zgjedhur kryetar i ri i degës së PD-së në Kavajë, pasi ka marrë mbështetjen e 945 anëtarëve dhe simpatizantëve demokratë që morën pjesë në proces.
Në reagimin e tij pas shpalljes së rezultatit, Hylviu e cilësoi besimin e marrë si një përgjegjësi të madhe, ndërsa premtoi angazhim maksimal për forcimin e Partisë Demokratike në Kavajë dhe përballjen me sfidat politike të së ardhmes.
Ai falënderoi liderin e Partisë Demokratike Sali Berisha për besimin, si edhe kryetarin e Bashkisë së Kavajës, Fisnik Qosja, për kontributin dhe angazhimin në organizimin e procesit zgjedhor.
Hylviu shprehu gjithashtu mirënjohje për kandidaten tjetër në garë, Arta Arkaxhiu, duke vlerësuar qytetarinë dhe korrektësinë gjatë gjithë procesit elektoral.
Ndërkohë, kryebashkiaku Fisnik Qosja përgëzoi kryetarin e ri të degës, duke theksuar se Partia Demokratike në Kavajë dha një shembull demokracie dhe qytetarie. Ai deklaroi se pas përfundimit të procesit zgjedhor, tashmë nis puna për zgjedhjet e ardhshme dhe për thellimin e mbështetjes së demokratëve në qytet.
Sipas organizatorëve, në procesin zgjedhor dhe referendumin kombëtar në mbështetje të Sali Berishës morën pjesë rreth 1400 anëtarë të Partisë Demokratike në Kavajë, ndërsa votimi u zhvillua në mënyrë të qetë dhe pa incidente.
