Deputetja e Lëvizjes Vetëvendosje, Fitore Pacolli ka reaguar pas zhvillimeve të fundit në Vetëvendosje.
Ajo në një status në Facebook ka thënë se mesazhi me përmbajtje ofenduese që Aida Dërguti ka shkruar për Albin Kurtin është i papranueshëm dhe nuk mund të arsyetohet.
Ajo shkruan se aktivistët e Lëvizjes Vetëvendosje e kanë për obligim ta mbrojnë Lëvizjen dhe të punojnë që ta zhvillojmë tutje, gjë që sipas saj nuk bëhet pa Albin Kurtin.
Ky është reagimi i plotë i saj në Facebook:
Të dashur aktivistë, mbështetës, simpatizues dhe ju kritikë të Lëvizjes VETËVENDOSJE!
Lëvizja dallon shumë nga partitë tjera në Kosovë qoftë nga mënyra e organizimit dhe funksionimit apo nga puna e palodhshme dhe sakrifica që është bërë nga të gjithë aktivistët pa dallim.
Ne kemi kultivuar demokraci të brendshme e cila nuk është aplikuar në asnjë parti tjetër. Dhe për këtë duhet të jemi krenar e të vendosur të punojmë që demokracia në Lëvizjen tonë të përmirësohet tutje sepse vetëm kështu vazhdojmë të zhvillohemi si Lëvizje për të cilën ka shumë nevojë vendi ynë.
Ne jemi Lëvizje që lëvizim, zhvillohemi dhe asnjëherë nuk nënshtrohemi. Vetëm kështu arritëm ku jemi sot pra subjekti më i madh dhe më demokratik në vend. Por kjo rritje ka ardhur me përgjegjësi të cilën duhet ta dëshmojmë me punë dhe maturi.
Ofendimi që Aida i ka bërë Albinit është i papranueshëm dhe nuk mund të arsyetohet.
Së pari, ne si deputetë të Lëvizjes dhe përfaqësues të popullit natyrisht se mund të kemi mendime dhe qëndrime të ndryshme. E për më tepër ne jemi persona politikë të përgatitur për të marrë vendime të rëndësishme për të ardhmen Lëvizjes dhe të vendit tonë. Por, qëndrimet tona duhet të thuhen hapur dhe jo të fyejmë prapa shpinës. Ne si aktivistë të Lëvizjes nuk duhet të praktikojmë këtë mënyrë të shprehjes së mospajtimeve që kemi.
Së dyti, diskutimet dhe qëndrimet tona duhet të jenë parimore pa ofendime dhe lincime sepse vetëm kështu mund të realizojmë idealet e Lëvizjes. Ne duhet të vazhdojmë të ballafaqojmë hapur idetë dhe qëndrimet tona. Gjuha denigruese duhet të kritikohet pavarësisht a përdoret nga burrat apo gratë.
Dhe për fund ne aktivistët e Lëvizjes Vetëvendosje!, e kemi për obligim ta mbrojmë Lëvizjen dhe të punojmë që ta zhvillojmë tutje. Por këtë nuk mund ta bëjmë pa Albinin i cili me visionin, parimësinë, këmbëngulësin e intelektin a tij e pa dyshim me ndihmën e secilit aktivist ka sjellë Lëvizjen këtu ku është sot./Kosova Post/
