Njëvjetori i tragjedisë në stacionin hekurudhor të Novi Sad-it u përkujtua me përleshje masive mes studentëve dhe policisë serbe.
Dhjetëra mijëra njerëz u mblodhën për të përkujtuar të 16 të vdekurit si pasojë e rrezimit të strehës prej betoni në stacionin hekurudhor në qytetin më të madh të Serbisë. Ata vendosën aty lule dhe qirinj.
Serbia është përballur që nga ajo kohë me protesta të njëpasnjëshme të udhëhequra nga studentët. Fillimisht, protestuesit kërkuan hetim transparent të punimeve për rikonstruksionin e godinës së stacionit hekurudhor. Pas hezitimit të qeverisë së presidentit Vuçiç për të dënuar fajtorët, thirrjet e tyre u zgjeruan në kërkesa për zgjedhje të parakohshme.
Fillimisht Vuçiç i ka quajtur demonstruesit “puçistë të financuar nga jashtë”, por së fundmi ai kërkoi ndjesë publike për këto deklarata. Simbol i protestës të kësaj fundjave u bë Dijana Hrka, nëna e të riut Stefan Hrka, i cili vdiq në atë tragjedi. Ajo nisi një grevë urie para Parlamentit të Serbisë, duke kërkuar përgjegjësi për vdekjen e djalit të saj dhe të tjerëve.
Qytetarët që ishin mbledhur për të mbështetur Dijana Hrkën tentuan të thyenin kordonin policor dhe për të hyrë me forcë në godinën e Asamblesë Kombëtare.
Policia serbe ndërhyri dhunshëm për të shpërndarë turmën, duke arrestuar 37 persona me akuzën e prishjes së rendit dhe qetësisë publike.
